Daeth cannoedd o ddisgyblion ysgolion uwchradd yn Fflorida at ei gilydd heddiw i ffurfio siâp calon anferth ar gae pêl-droed fel rhan o brotest i alw am newid deddfau gynau'r Unol Daleithiau. Digwyddodd y brotest ar ôl i 17 aelod o staff a disgyblion gael eu saethu’n farw a nifer eraill eu hanafu yn Ysgol Uwchradd Marjory Stoneman Douglas yn Parkland, Fflorida, ar 14 Chwefror 2018. Mae Nikolas Jacob Cruz, 19 oed, cyn-ddisgybl yn yr ysgol, wedi ei arestio yn dilyn y trychineb.
Ar hyd a lled y wlad, cerddodd disgyblion allan o’u dosbarthiadau i fynnu rheolau mwy caeth ynglŷn â gynau. Maen nhw eisiau cyfyngu mwy ar bwy sy’n gallu prynu gynau, gan alw hefyd am well gwasanaethau ar gyfer iechyd meddwl.
Cafodd eu galwadau eu cefnogi gan y cyn-arlywydd, Barack Obama, drwy neges ar Twitter. Dywedodd yr Arlywydd Trump hefyd mewn trydariad ‘nad oes unrhyw beth yn bwysicach na diogelwch ein plant.’
Ar hyn o bryd, mae hawl gan berson 21 oed i brynu gwn llaw, ond gall person 18 oed brynu reiffl, fel yr AR-15 a ddefnyddiwyd gan y cyn-ddisgybl yn Fflorida.
BEAUTIFUL ❤️
— Nina Harrelson 🎥 (@NinaHarrelsonTV) 21 February 2018
Hundreds of students at Florida's Coral Springs High School formed a heart on the football field to support the students affected by the Parkland school massacre. pic.twitter.com/hmvYaLqjQl
Cymraeg | Disgrifiad | Saesneg |
---|---|---|
trychineb | digwyddiad ofnadwy | disaster |
caeth | llym, tynn | strict, tight |
cyfyngu | rhwystro, stopio | (to) restrict |
trydariad | neges ar Twitter | tweet |
reiffl | dryll hir, sy'n cael ei saethu o'r ysgwydd | rifle |