Sul, 31 Gorffennaf 2011 20:31:07
Haia Rhys! Gobeithio dy fod ti'n well. Mae'n biti dwyt ti ddim yma efo ni. Mi fasat ti wrth dy fodd efo'r genod o'r Sowth. Dan ni wedi gneud ffrindia efo tair o Abertawe - Siwan, Jasmine a Nia. Ma nhw'n siarad yn wahanol i ni ac yn deud petha fel 'Sai moyn' ond dan ni'n dallt nhw'n ddigon da i ddod ymlaen efo'n gilydd! ;-) ;-) Jasmine ma Iwan yn ffansio a dw inna'n licio Nia! Ma 'na bump diwrnod eto so gobeithio'r gora...
Anfonwyd o fy iPhone
Llun, 1 Awst 2011 17:45:14
Iawn? Nathon ni gal andros o hwyl ar y llyn (Llyn Tegid) heddiw. Nathon ni glymu chwech canŵ yn sownd wrth ei gilydd a chwarae gêm o neidio o ganŵ i ganŵ heb syrthio i'r llyn. A pwy nath syrthio i'r llyn? Ia, fi! Ron i'n socian!
Anfonwyd o fy iPhone
Mawrth, 2 Awst 2011 12:45:00
Ma gyda'r nos yn hwyl yma - nofio yn y pwll, gêm 5 bob ochr ac yna dawnsio gwerin neithiwr. Ma pawb yn joinio a chael hwyl! Ond go brin y basat ti'n gallu ei wneud efo dy goes mewn plastar!
Anfonwyd o fy iPhone
Mercher, 4 Awst 2011 02:03:23
Newydd gael row gan un o'r Swogs! Cael ein dal yn crwydro'r coridor yn chwarae ysbrydion! Nathon nhw ddeud y basan nhw'n ein gyrru ni adra os basan ni'n gneud hyn'na eto! Wps!
Anfonwyd o fy iPhone
Iau, 5 Awst 2011 14:57:35
S'mai mêt? Sut mae dy goes di heddiw? Mynd i rafftio dŵr gwyn p'nawn 'ma. Fedra i ddim disgwyl!
Anfonwyd o fy iPhone
Iau, 5 Awst 2011 14:57:35
Dw i ddim yn siwr ydw i isio rafftio dŵr gwyn eto achos mi nath o godi dychryn arna i! Roedd 12 yn y rafft ac roedden ni'n cael ein hyrddio (gair y 'swogs' - swyddogion y gwersyll - am 'taflu') i lawr yr afon. Doedd gynnon ni ddim rheolaeth dros y rafft o gwbwl! Paid â deud wrth mam neu mi fasa hi'n cal ffit!
Anfonwyd o fy iPhone
Gwener, 6 Awst 2011 16:16:28
Noson ola heno - disgo! Gobeithio fydda i wedi cael lwc efo Nia o Abertawe erbyn diwedd y noson! Gei di'r hanes i gyd fory...
Anfonwyd o fy iPhone
Mae gan Urdd Gobaith Cymru ddau wersyll - Glan-llyn yn y gogledd a Llangrannog yn y de. Llangrannog oedd y cyntaf i agor yn ôl yn 1932.
Roedd gwersyll Llangrannog mor boblogaidd, yn 1950 penderfynodd yr Urdd sefydlu Gwersyll arall ar gyfer plant hŷn yr Urdd -Glan-llyn.
Heddiw, bydd plant o bob rhan o Gymru yn mynd i Lan-llyn i fanteisio ar y lleoliad delfrydol ar lan Llyn Tegid ym mynyddoedd Eryri. Gall hyd at 230 gysgu yno ac mae'r gweithgareddau cyffrous yn cynnwys dringo, canŵio, rafftio dŵr gwyn, bowlio deg, cwrs rhaffau uchel a mynydda.
Tasgau
TASG 1
Pam dydy Rhys ddim yng Ngwersyll yr Urdd, Glan-llyn?
TASG 2
Pam mae Gwyn yn dweud "Ma 'na bump diwrnod eto, so, gobeithio'r gora..."?
TASG 3
Gair byr am beth ydy ‘swogs’?
TASG 4
Sut roedd Gwyn yn teimlo pan oedd yn rafftio dŵr gwyn? Pam?
TASG 5
Pam wnaeth y swyddogion fygwth anfon y bechgyn adref?
TASG 6
Mae’r negeseuon wedi cael eu hysgrifennu mewn tafodiaith ogleddol. Lawrlwythwch y daflen a chwblhewch yr ymarferion.
TASG 7
Mae Gwyn yn dweud rhai pethau wrth ei ffrind na fyddai yn dweud wrth ei rieni. Beth ydyn nhw? Pe bai'n ysgrifennu at ei rieni am beth fyddai e’n sôn?
TASG 8
Dychmygwch eich bod ar eich gwyliau. Ysgrifennwch e-bost at ffrind neu at aelod o’ch teulu yn dweud eich hanes. Gallwch ysgrifennu yn eich tafodiaith chi os dymunwch.
