Mae gwyliau cerdd yn boblogaidd iawn dros yr haf, wrth gwrs, ac maen nhw’n digwydd ar draws y byd. Dyma gyfle i bobl ifanc (a phobl sydd ddim mor ifanc!) ddod at ei gilydd i fwynhau sesiynau byw gyda bandiau a cherddorion dawnus (a rhai sydd ddim mor ddawnus!). Dyma gyfle hefyd i fwynhau cwmni ffrindiau hen a newydd, i ddawnsio ac i ymlacio. Mewn gair, dyma gyfle i FWYNHAU ac i anghofio am broblemau bywyd a helyntion y byd.
Gŵyl Sŵ Trydanol Efrog Newydd
Dyna beth sy’n digwydd yng ngŵyl flynyddol Sw Trydanol Efrog Newydd hefyd, gyda miloedd o bobl yn tyrru yma o bellafoedd y ddaear i ddathlu penwythnos Gŵyl Lafur ac i fwynhau cerddoriaeth electronig. Mae bandiau enwocaf y byd yn dod yma i berfformio bob blwyddyn ac eleni, bydd yr ŵyl, fydd yn cael ei chynnal o 31 Awst tan 2 Medi, yn ddeg oed. Maen nhw’n addo’r ŵyl fwyaf a’r fwyaf cyffrous erioed – gŵyl i’w chofio mae’n siwr!
Ond roedd gŵyl y llynedd yn un fythgofiadwy hefyd! Roedd rhywbeth ynddi oedd yn gwneud i’r partïwyr stopio am ennyd ac i ystyried. Yn edrych i lawr arnyn nhw, o’r coed tal, roedd lluniau o bennau anifeiliaid. Yn eu tro, roedd pen llew, gorila, eliffant, igwana, tylluan ac anifeiliaid eraill yn gwylio pawb, gyda’u llygaid yn dilyn y partïwyr yng nghanol yr holl firi!
Animal Watching
Gosodiad celfyddydol o’r enw Animal Watching oedd hyn a’r bwriad oedd codi ymwybyddiaeth y bobl bod cynefinoedd yr anifeiliaid o dan fygythiad. Mewn geiriau eraill, tra roedden nhw’n mwynhau eu hunain, roedd dyn yn rhywle arall yn dinistrio cynefinoedd, yn lladd anifeiliaid ac yn difetha ecosystemau.
Roedd y gosodiad yn awgrymu bod yr anifeiliaid hyn yn gwylio dyn a’u bod nhw’n anhapus iawn gan ei fod mor ddinistriol.
Os ydych chi eisiau gweld peth o’r gwaith, cliciwch ar y wefan yma ac edrychwch ar Animal Watching @ Electric Zoo, New York. Sylwch yn arbennig ar wynebau’r anifeiliaid:
Maizz Visual greodd y gosodiad, ar sail adroddiad gan y WWF* a oedd yn dangos bod hanner yr anifeiliaid gwyllt yn y byd wedi diflannu oddi ar wyneb y ddaear yn ystod y 42 mlynedd diwethaf, o ganlyniad i weithredoedd dyn. Rydyn ni’n eu lladd nhw … rydyn ni’n llygru eu hamgylchedd … rydyn ni’n dinistrio’u cynefinoedd. Mae hyn yn anhygoel! Mae hyn yn anfoesol!
Mae Maizz Visual yn bwriadu mynd â’r gosodiad i wyliau ar hyd a lled y byd er mwyn codi ymwybyddiaeth mwy o bobl o’r perygl, felly ga i roi her i wyliau Cymru? Beth am geisio denu’r gwaith hwn i rai o wyliau Cymru eleni – neu o leiaf beth am i ni feddwl am ffordd arall o geisio gwneud pobl yn ymwybodol o ganlyniadau ein gweithredoedd ni ar fywyd gwyllt? Mae’n ddigon hawdd i ni ymgolli yn y gerddoriaeth … a’r dawnsio … a’r gwmnïaeth … a’r mwynhad, ond allwn ni ddim o ddifri droi ein cefnau ar bethau pwysicach y byd!
Beth amdani, drefnwyr gwyliau Cymru?
* Os hoffech chi wybod mwy am yr WWF, ewch i:
Geirfa
| Cymraeg | Disgrifiad | Saesneg |
|---|---|---|
| Gŵyl Lafur | gŵyl Americanaidd i ddangos parch tuag at weithwyr a'u gwaith, ar y dydd Llun cyntaf ym mis Medi. Mae'n gyfle i gael diwrnod o wyliau ac i ffarwelio â'r haf. | Labour Day |
| taflunio | dangos llun ar sgrin neu ar ryw wrthrych arall | (to) project |
| miri | hwyl, rhialtwch | fun |
| gosodiad celfyddydol | darn o gelf sy'n cael ei osod yn rhywle | art installation |
| ymwybyddiaeth | bod yn ymwybodol o rywbeth | awareness |
| cynefinoedd | lluosog cynefin; lle mae'r anifeiliaid yn byw | habitats |
| o dan fygythiad | mewn perygl | under threat |
| dinistrio, difetha | distrywio | (to) destroy |
