Rholio yn yr eira neu doddi yn yr haul?

Annwyl Gweiddi,

Doeddwn i ddim yn gallu credu fy llygaid pan agorais i’r llenni un diwrnod ym mis Rhagfyr y llynedd (2017)!

Roedd cesig eira enfawr yn gorwedd ar hyd y cae gyferbyn â’r tŷ – ac roedd rhai llai yn gorwedd ar hyd bonet y car ar y stryd. Pwy oedd wedi’u gwneud nhw? Oedd fy rhieni wedi bod allan yn chwarae yn yr eira pan oedd pawb arall yn cysgu? Go brin! Dydyn nhw ddim yn bobl anturus iawn (yn wahanol i fi a fy mrawd!!)

Ar ôl edrych ar y we, gwelais mai “rholeri eira” oedden nhw (mae llun yn yr atodiad). Dyna’r tro cyntaf erioed i mi weld peli eira mor fawr – ac mor hardd. Roedd rhaid i mi fynd allan i dynnu eu lluniau (gweler yr atodiad), ac yn wir, roedd rhaid i mi fynd i gerdded ar hyd y caeau i weld oedd mwy ohonyn nhw – ac oedd, mi roedd llawer ohonyn nhw ar hyd yr ardal. Am gyffrous!

Ond, a bod yn onest, doedd hi ddim yn syndod gweld cesig eira y llynedd oherwydd roedd y tywydd mor eithafol on’d oedd! Ar y dechrau, roeddwn i wrth fy modd i weld yr eira’n cyrraedd (a’r ysgol yn cau!). Roeddwn i wrth fy modd yn cerdded drwy’r eira trwm i dŷ Nain i wneud yn siŵr ei bod hi’n cadw’n gynnes yn yr oerfel! Ond roedd yr eira y llynedd yn ormod on’d oedd? Ar ôl cael wythnos ar ôl wythnos o oerfel, rhew ac eira, roeddwn i’n dyheu am weld y glaw unwaith eto! O leiaf gallwch chi chwarae hoci yn y glaw!

Tybed sut bydd hi eleni?

Nadolig Llawen!

Cadi

Llun: Snow roller / Rouleau de neige - Mylène © Flickr o dan drwydded Attribution-NonCommercial-NoDerivs 2.0 Generic