Dw i'n methu credu fy llygaid! Dw i newydd ddod yn ôl o'r dref ar ôl bod yn gwneud ychydig o siopa Nadolig, ac yno gwelais i rywbeth hollol hurt! Roedd ci mawr yn cerdded i lawr y stryd gyda'i berchennog ac roedd o (y ci!) yn gwisgo cyrn carw oedd yn fflachio!
Dw i'n meddwl bod cyrn carw sy'n fflachio'n eitha cŵl ar gi. Does gan fy nghi i ddim cyrn yn fflachio - ond mae ganddo fo wig, sbectol haul a medal wnes i eu prynu iddo ar ei ben-blwydd y llynedd. Beth ydych chi'n feddwl? Cŵl neu beidio?
Prynais i tutu i Bonzo, fy nghi i, y llynedd. Mae o'n edrych yn hyfryd ynddo fo - ond dydy o ddim wedi dechrau gwneud bale eto!
Dw i'n mynd i brynu dillad i fy nghath i fel anrheg Nadolig eleni. Dw i'n meddwl bod cathod yn edrych yn smart iawn mewn dillad ac mae'n ffordd dda o gadw'n gynnes yn y tywydd oer!
Ydy pawb wedi mynd yn hollol wirion? Beth sy'n bod ar bawb? Ci yw ci - nid dawnsiwr mewn bale! Cath yw cath - nid person. Dydy cŵn, cathod, moch cwta, nac unrhyw anifail arall, ddim i fod i wisgo dillad - na chyrn sy'n fflachio! Mae'n annaturiol! Dydy cŵn, cathod, moch cwta - nac unrhyw anifail arall- ddim i fod i gael anrhegion Nadolig chwaith!
Dim ond tipyn o hwyl yw e! Mae'n amlwg bod y ci yma'n hoffi ei wisg liwgar.
Efallai - ond dydy gwneud hwyl am ben anifeiliaid ddim yn neis iawn.
Byddai'n well gwario'r arian ar rywbeth arall - yn lle rhoddion twp i anifeiliaid.
Geirfa
| Cymraeg | Disgrifiad | Saesneg |
|---|---|---|
| cyrn | lluosog corn | horns |
| annaturiol | ddim yn naturiol | unnatural |
Tasgau
Tasg 1
Pa fath o anrhegion sydd ar gael ar gyfer anifeiliaid anwes? Ydych chi wedi rhoi anrheg i anifail anwes erioed? Beth? Pam?
Tasg 2
Darllenwch y darn eto a lawrlwythwch y darn.
Tasg 3
“Mae gwisgo anifeiliaid anwes mewn dillad yn syniad ardderchog!” Ydych chi o blaid neu ydych chi yn erbyn y syniad yma? Meddyliwch am bwyntiau da i gefnogi’ch barn. Yna, trafodwch hyn.
