Taith eithafol

Mae hi wedi teithio i fyny mynydd uchaf Ewrop. Mae hi wedi teithio i un o'r lleoedd oeraf ar y blaned. Mae hi wedi teithio i lawr drwy'r dŵr yn y llyn dyfnaf yn y byd. Beth yw hi ...? Y ffagl Olympaidd. 

Y Ffagl Olympaidd

Mae 14,000 o ffaglau wedi cael eu creu ar gyfer Gemau Olympaidd y Gaeaf, 2014. Dyna faint o bobl fydd wedi bod yn cario'r fflam Olympaidd i Sochi, yn Rwsia, lle mae Gemau Olympaidd y Gaeaf, 2014, yn cael eu cynnal.

Y cynllun

Cynnau'r fflam

Roedd y cynllunwyr eisiau creu ffagl sy'n edrych fel pluen oherwydd cawson nhw eu hysbrydoli gan hen chwedl o Rwsia sy'n sôn am yr aderyn tân. 

Cafodd y fflam ar gyfer y ffagl ei chynnau gan olau'r haul a drych arbennig yn Olympia, Groeg. Yna, cafodd hi ei chario drwy Roeg am 7 diwrnod nes cyrraedd Athen. Yna, cafodd hi ei hedfan i Moscow lle y dechreuodd ar ei thaith i'r Gemau yn Sochi, Rwsia.

Y daith orau erioed.

Eleni, mae'r swyddogion wedi ceisio creu'r daith orau erioed ar gyfer y ffagl Olympaidd.

Erbyn iddi hi gyrraedd y seremoni agoriadol yn Sochi, bydd hi wedi:

• teithio 65,000km                                
• bod i bob ardal yn Rwsia
• teithio drwy 132 o ddinasoedd
• teithio i Begwn y Gogledd ar long arbennig sy'n torri trwy'r rhew
• teithio i fyny Mynydd Elbrus, y mynydd uchaf yn Ewrop
• cael ei chludo mewn awyren, hofrennydd, car, tram, karakat, ar sled ceirw, ar sled cŵn, ar gefn ceffyl, carw a chamel, ar feic pedair olwyn - a mwy! 

Nid hynny'n unig ...

... ym mis Tachwedd 2013, cafodd y ffagl ei chludo mewn roced Soyuz i'r Orsaf Ofod Ryngwladol. Yna, cafodd hi ei chario y tu allan i'r llong ofod wrth i ddau gosmonot gerdded yn y gofod. Dyma'r tro cyntaf i ffagl Olympaidd fod allan yn y gofod - y tu allan i roced neu'r Orsaf Ofod Ryngwladol.

Hefyd ...

ym mis Tachwedd 2013, cafodd y ffagl - a'r fflam - ei chario gan dri deifiwr i ddyfnder o 13 metr yn Llyn Baikal Siberia, y llyn dyfnaf yn y byd. Roedd llosgydd arbennig ar y ffagl ac felly roedd y fflam yn llosgi drwy'r amser - hyd yn oed yn y dŵr. Ar ôl cael ei phasio o ddeifiwr i ddeifiwr o dan y dŵr, pasiodd un o'r deifwyr y fflam i Mikhail Chuev a hedfanodd e dros y llyn ar uchder o 10 metr, gan ddefnyddio jetpack arbennig. Waw!

Taith anhygoel yn wir!