Cyngor Cefn Gwlad Cymru

“Mae’r Gymraeg yn fusnes i bawb!”

Dringo Bannau Brycheiniog? Yr olygfa o gopa’r Wyddfa? Aer y môr ar draethau’r Gŵyr? Ie, dyna rai o’r pethau sy’n gwneud Cymru yn wlad ddeniadol i ymwelwyr. Mae llawer o’r diolch am harddwch Cymru i’r Cyngor Cefn Gwlad. Nhw sy’n gyfrifol am gynnal prydferthwch naturiol, bywyd gwyllt a chyfleoedd hamddena awyr agored ar draws Cymru.

Ond nid hybu amgylchedd a thirwedd Cymru yn unig y mae’r Cyngor Cefn Gwlad. Mae’r ffordd y mae’r Cyngor yn gwneud yn siwr bod ganddo staff sy’n siarad Cymraeg yn dangos ei fod credu bod Cymraeg yn rhan werthfawr o’r profiad o fyw yng Nghymru. Nid rhywbeth i unigolion yw’r Gymraeg iddyn nhw, ond rhywbeth i bawb. I bawb sy’n byw yng Nghymru!

Mae gan y Cyngor ardaloedd cadwraeth ar draws Cymru mewn ardaloedd gwledig a diwydiannol yn ogystal â 13 o swyddfeydd. Mae dwy swyddfa gan gynnwys y brif swyddfa wedi’i lleoli ym Mangor, gyda swyddfeydd eraill yn Yr Wyddgrug, Dolgellau, Aberystwyth, Llandeilo, Abertawe, Doc Penfro, Llandrindod, Caerdydd, Bae Caerdydd, Y Drenewydd ac yn Y Fenni. Wrth gamu trwy ddrysau’r swyddfeydd hyn fe welwch fod y Gymraeg yn cael statws uchel iawn.

Y Gymraeg yn y Gweithle: Swyddi

Mae’r ffordd y mae’r Cyngor Cefn Gwlad yn recriwtio staff yn dangos mor bwysig yw cynllunio gofalus wrth gynnig dewis iaith i’r cyhoedd.

Yn gyntaf, er mwyn sicrhau bod y swyddfeydd yn gweithio’n ddwyieithog, mae’n rhaid i bob aelod o staff gael rhywfaint o allu sylfaenol yn y Gymraeg.

Yn ail, mae’r Cyngor yn penderfynu pa fath o sgiliau Cymraeg, ac ar ba lefel sydd eu hangen ar gyfer swyddi. Er enghrafft, mae sgiliau Cymraeg hyd at lefel benodol gan o leiaf un aelod o’r tîmau cadwraeth a’r tîmau gwarchodfeydd yn hanfodol.M ae disgwyl hefyd i staff y dderbynfa ymhob swyddfa fedru croesawu’r cyhoedd ac ateb y ffôn yn ddwyieithog.

Y mae hefyd yn penodi mwy o staff Cymraeg i weithio mewn swyddfeydd sydd mewn ardaloedd lle ceir canran uwch o siaradwyr Cymraeg.

Yn olaf, mae’r Cyngor yn rhan o gynllun cyffrous sy’n ceisio sicrhau staff dwyieithog i’r dyfodol, sef AmNawdd. Mae’r cynllun hwn yn cynnig nawdd i fyfyrwyr sy'n dilyn cyrsiau amgylcheddol yn rhannol trwy gyfrwng y Gymraeg. Cynllun ar y cyd yw hwn gyda'r Comisiwn Coedwigaeth, Asiantaeth yr Amgylchedd a’r Coleg Cymraeg Cenedlaethol yng Nghymru lle mae myfyrwyr yn cael nawdd yn ystod eu cwrs, ynghyd â lleoliad gwaith o bump wythnos gyda bwrsariaeth.

Mae’r cyfleoedd swyddi i siaradwyr Cymraeg yn eang felly ac yn cynnwys:

• swyddi cyswllt cyntaf yn y derbynfeydd
• swyddi cadwraeth a rheoli gwarchodfeydd
• swyddi gweinyddol
• swyddi lefel uwch fel arweinwyr tîm ac uwchreolwyr.