Darllenwch y sgyrsiau hyn gyda phartner.
Meddygfa 1
| Doctor: | Bore da. Sut dach chi heddiw? |
| Claf: | ’Symol, Doctor. ’Symol iawn! |
| Doctor: | O, be ’dy’r mater? |
| Claf: | Peswch cas. Dw i’n methu cysgu’r nos yn pesychu. |
| Doctor: | O diar! Wnewch chi besychu rŵan i mi gael clywed pa fath o beswch sy gynnoch chi? |
| (Mae’n peswch … yn peswch … ac yn peswch!) | |
| Doctor: | O, mi wela i. |
| Claf: | Be’ dach chi’n weld? |
| Doctor: | Y broblem … Mae gynnoch chi beswch cas. |
| Claf: | Dyna ddudes i ar y dechra yntê? |
| Doctor: | Ia, wir. Wel, dim angen poeni. Mae gen i’r ateb i’ch problem chi. |
| Claf: | O? |
| Doctor: | Siocled! |
| Claf: | Pardwn? |
| Doctor: | Siocled! Mae’n ffordd wych o leddfu peswch. O safbwynt methu cysgu yn y nos, yfwch ddiod o siocled poeth cyn mynd i’r gwely. Mi fyddwch chi’n cysgu fel babi wedyn. |
| Claf: | Siocled. Dyna fo?!? |
| Doctor: | Ia, am y tro. Hwyl fawr i chi. |
| Claf: | Hwyl! |
| (Mae’n peswch yn gas wrth fynd allan. Mae’r doctor yn agor drôr yn ei ddesg ac yn torri stribed o siocled o far mawr sy’n cuddio yno.) | |
| Doctor: | Aa! Does dim byd fel siocled. Reit, y claf nesaf … |
Meddygfa 2
| Doctor: | Bore da. Siwt mae heddi? |
| Claf: | Ddim yn dda. |
| Doctor: | O, beth sy’n bod? |
| Claf: | Dw i wedi blino’n ofnadwy a dw i’n becso hefyd. |
| Doctor: | Pam? |
| Claf: | Mae llawer o waith ’da fi ar hyn o bryd a dw i’n becso am hyn. |
| Doctor: | Odych chi’n cysgu? |
| Claf: | Ddim yn dda iawn. |
| Doctor: | Wel, rhaid i chi ymlacio mwy. |
| Claf: | Haws dweud na gwneud. |
| Doctor: | Odi, mae’n siwr … ond mae’r ateb ’da fi. Siocled! |
| Claf: | Pardwn? |
| Doctor: | Siocled! Mae’n grêt ar gyfer helpu rhywun i ymlacio ac mae’n helpu i ryddhau endorphins yn yr ymennydd hefyd. |
| Claf: | “Endo” beth? |
| Doctor: | Endorphins – cemegau yn y corff sy’n lleihau stres ac sy’n gallu gwneud i chi deimlo’n dda. |
| Claf: | Siocled. Dyna i gyd?!? |
| Doctor: | Ie, am y tro. Hwyl fawr i chi. |
| Claf: | Hwyl! |
| (Mae’r doctor yn agor drôr yn ei ddesg ac yn torri stribed o siocled o far mawr sy’n cwato yno.) | |
| Doctor: | Aa! Does dim byd fel siocled. Reit, y claf nesaf … |
Meddygfa 3
| Doctor: | Bore da. Sut mae? |
| Claf: | Iawn, diolch. |
| Doctor: | “Iawn?” Wel pam rydych chi yma os ydych chi’n “iawn”? |
| Claf: | Wel, dw i ddim yn sâl, ond edrychwch ar fy wyneb i. |
| (Mae’n pwyntio at ei wyneb lle mae cannoedd o smotiau.) | |
| Doctor: | O ie, dw i’n gweld. Ydych chi’n bwyta’n iach? |
| Claf: | Ar y cyfan, ydw, ond mae Mam yn dweud fy mod i’n bwyta gormod o siocled ac mai hyn sy’n rhoi’r smotiau ofnadwy i mi. |
| Doctor: | Wel, mae gormod o siocled yn ddrwg i chi, wrth gwrs – yn enwedig siocled llaeth, ond dw i ddim mor siwr ydy siocled yn rhoi smotiau i chi. |
| Claf: | O? |
| Doctor: | Wel, dydy gwyddonwyr ddim yn gallu cytuno ydy siocled yn rhoi smotiau i chi neu beidio. |
| Claf: | Wel, diolch am hynny! Galla i fwyta bar o siocled bob dydd felly. |
| Doctor: | Mmm … na allwch! Mae pethau eraill mewn siocled – nid jyst coco – pethau fel braster a siwgr ac mae bwyta gormod o’r rhain yn ddrwg i chi. |
| Claf: | Ond roeddwn i’n meddwl bod bwyta siocled yn gallu bod yn dda i chi. |
| Doctor: | Yn sicr, mae’n gallu helpu mewn rhai achosion. Mae gwyddonwyr yn meddwl bod siocled yn gallu helpu i leihau’r risg o gael strôc, mae’n gallu helpu person i deimlo’n fwy effro, mae’n gallu helpu pobl i ymlacio ac mae’n gallu helpu i leddfu peswch, ond dydy bwyta gormod o siocled ddim yn dda i chi. Rhaid i chi drin siocled fel trît i’w fwyta bob hyn a hyn, nid fel rhan arferol o’ch diet pob dydd – ac mae siocled tywyll yn well i chi na siocled golau. |
| Claf: | O, dw i’n gweld. A beth am yr acne? |
| Doctor: | Bwyd iach … awyr iach … digon o ymarfer … a dyma bresgripsiwn i chi hefyd. Os nad yw’n gwella, dewch yn ôl mewn tri mis. |
| Claf: | Diolch yn fawr. Hwyl fawr i chi! |
| Doctor: | Hwyl! |
| (Mae’n mynd allan. Mae’r doctor yn agor drôr yn ei ddesg ac yn edrych ar far mawr o siocled sydd yno – heb ei ddechrau.) | |
| Doctor: | Siocled – mae’n iawn o’i fwyta’n gymedrol! Reit, y claf nesaf … |
Geirfa
| Cymraeg | Disgrifiad | Saesneg |
|---|---|---|
| lleddfu | tawelu, gwanhau | (to) ease |
| o safbwynt | mewn perthynas â, edrych ar rywbeth o gyfeiriad arbennig | point of view |
| haws dweud na gwneud | mae'n haws siarad am rhywbeth na'i wneud | easier said than done |
| ar y cyfan | gan fwyaf | on the whole |
| cymedrol | heb fod yn ormodol | in moderation |
