Hir!

Dim ond eiliadau mae’n cymryd i lyncu darn o siocled, ond mae cynhyrchu siocled yn cymryd amser hir.

I ddechrau …

• … mae siocled yn cael ei wneud o ffa arbennig. Mae’r ffa’n tyfu ar goeden drofannol o’r enw Theobroma cacao. Enw arall yw’r goeden coco.
• Mae’r ffrwythau’n tyfu’n syth o’r canghennau, fel rydych chi’n gallu gweld o’r llun hwn.

Ar y chwith mae'r ffrwyth anaeddfed. Ar y dde mae'r ffrwyth sydd bron yn aeddfed.

• Pan fydd y ffrwythau’n aeddfed, mae’r ffermwyr yn eu casglu nhw. Fel arfer, maen nhw’n defnyddio machete i’w torri o’r coed.

• Ar ôl eu casglu, maen nhw’n agor y ffrwythau â llaw, a’r tu mewn iddyn nhw, mae pwlp gwyn sy’n cynnwys tua 30-40 o ffa. Mae’r rhain yn chwerw iawn. Dydyn nhw ddim yn flasus fel y siocled byddan nhw’n ei greu.

Y ffa coco - y tu mewn i'r ffrwyth.

Yna …

… mae’r ffermwyr yn eplesu’r ffa. Maen nhw’n gosod y ffa mewn biniau arbennig neu maen nhw’n eu rhoi nhw o dan ddail banana i’w heplesu. Yn ystod y broses, mae’r ffa’n troi’n llai chwerw.

• Ar ôl cael eu heplesu, mae’r ffa’n cael eu sychu yn yr haul am ddyddiau. Yn ystod y cyfnod hwn, mae’r blas yn dal i ddatblygu.

• Mae’r ffa’n cael eu cludo i ffatri wedyn.

Yno …

• … mae’r ffa’n cael eu glanhau. Rhaid gwneud yn siwr nad oes brigau neu gerrig neu unrhyw sbwriel arall yng nghanol y ffa!

Yn dilyn hyn …

• … mae’r ffa’n cael eu rhostio. Mae’r blas yn gwella yn ystod y broses ac maen nhw’n troi’n dywyllach.

Nesaf …

• … rhaid cracio’r ffa a chael gwared ar y plisgyn ar y tu allan. Ar ôl gwneud hyn, mae’r ffa yn ddarnau bach. Mae’r rhain yn flasus ond maen nhw’n dal yn chwerw.

Y camau nesaf …

• … rhaid malu’r darnau bach yn bâst ac yna rhaid ychwanegu pethau fel siwgr, menyn coco, llaeth neu fanila. Bydd hyn yn dibynnu ar y rysáit.
• Gan nad yw’r siocled yn llyfn yn ystod y cam hwn, rhaid ei roi drwy beiriant arbennig sy’n ei droi a’i gymysgu.

Yna,

• … mae’r siocled yn cael ei oeri … yna’i boethi … yna’i oeri … yna’i boethi … ac yn y blaen nes ei fod yn llyfn ac yn edrych yn dda.

Yn olaf …

Mae’r siocled yn cael ei roi mewn i fowld a’i oeri. Yna, pan fydd yn barod, mae’n cael ei dynnu o’r mowld ac, ar ôl ei becynnu, mae’n cael ei werthu i bobl fel chi!

Ydy, mae’n broses hir.