Colli diwrnod!

Rhifyn 6 - Amser
Colli diwrnod!

Ddiwedd 2011, collodd Samoa ddiwrnod, sef 30 Rhagfyr 2011. Neidion nhw'n syth o 29 Rhagfyr i 31 Rhagfyr. Felly, roeddech chi'n anlwcus iawn os oeddech chi'n byw ar e2_1.jpgyr ynysoedd ac yn dathlu eich pen-blwydd ar 30 Rhagfyr.

Mae Samoa hanner ffordd rhwng Seland Newydd a Hawaii. Ym mis Mai 2011, penderfynon nhw groesi'r Ddyddlinell fel eu bod nhw'r un diwrnod ag Awstralia a Seland Newydd.

Masnachu

Ers 119 mlynedd, roedden nhw wedi bod yr un diwrnod ag Unol Daleithiau America (UDA). Ond maen nhw'n masnachu mwy gydag Awstralia a Seland Newydd. Roedd y Ddyddlinell yn gwneud pethau'n anodd iddyn nhw:

• Pan oedd hi'n ddydd Gwener yn Samoa, roedd hi'n ddydd Sadwrn yn Awstralia a Seland Newydd.
• Wedyn, pan oedd hi'n ddydd Sul yn Samoa, roedd hi'n ddydd Llun yn Awstralia a Seland Newydd.

Felly, dim ond ar ddyddiau Mawrth, Mercher ac Iau roedden nhw'n gallu cysylltu â phobl eraill mewn swyddfeydd. Hefyd, mae llawer o bobl o Samoa wedi mynd i fyw i Seland Newydd, felly roedd hi'n anodd i deuluoedd drefnu i gwrdd â'i gilydd.

 

samoamap2.jpg

Y Ddyddlinell

e2_2.jpgMae'r Ddyddlinell yn rhedeg o'r gogledd i'r de ar hyd llinell hydred 180 gradd yn y Môr Tawel.

Llinell ddychmygol yw hi - hynny yw, dydy hi ddim yno go iawn.

Dydy hi ddim yn hollol syth chwaith. Weithiau mae hi'n gwyro i'r chwith neu i'r dde fel nad yw hi'n croesi tir a hefyd fel bod grŵp o ynysoedd gyda'i gilydd yn yr un diwrnod.

Geirfa

Cymraeg Disgrifiad Saesneg
Dyddlinell (eb) y llinell rhwng dau ddiwrnod International Date Line
masnachu prynu a gwerthu to trade
cysylltu â - to get in contact with
dychmygol mewn llun yn y meddwl imaginary
gwyro plygu to deviate

Tasgau

Tasg 1

Dychmygwch eich bod chi’n byw ac yn gweithio ar Samoa. Ydy symud i’r un diwrnod â Seland Newydd ac Awstralia yn syniad da? Rhowch resymau.

Tasg 2

Ydych chi’n adnabod rhywun sydd wedi croesi’r Ddyddlinell? NEU Ydych chi wedi gorfod newid eich wats wrth deithio i wlad arall? Trafodwch.

Tasg 3

Lawrlwythwch y daflen a llenwch y tabl â'r berfenw cywir.

Mwy o’r rhifyn yma...