Cerdd: Yn y Gampfa

Yn y Gampfa

Rwy'n rhedeg ac rwy'n rhwyfo,

heb fynd o'r fan; gobeithio

caf wella wrth hyfforddi,

fel 'mod i yn fwy heini.

Rwy'n chwysu ac rwy'n chwifio

fy mreichiau wrth ystwytho,

a phawb yn drwch o'm cwmpas

yn pwffian ac yn gochlas.

Rwy'n ceisio codi'r pwysau

heb feddwl am y poenau;

gwell canolbwyntio heno

ar darged, nid ar gwyno.

Rwy'n seiclo, ond rwy'n stopio

ar ôl rhyw awr o wibio;

a throi'r hen gar am adref

i ddianc rhag y dioddef.