Perygl!

Mae llawer o bobl yn dod i Orllewin Cymru yn ystod yr haf bob blwyddyn. Mae rhai'n dod i fwynhau'r traethau glân a'r môr glas ond mae rhai'n dod er mwyn ceisio gweld y dolffiniaid sy'n nofio ym Mae Ceredigion.

Mae dolffiniaid yn greaduriaid hardd. Maen nhw'n anifeiliaid cyfeillgar a charedig hefyd. Yn ôl rhai, mae cysylltiad arbennig rhwng dolffiniaid a phobl. Mae rhai pobl yn mwynhau nofio gyda nhw mewn canolfannau arbennig ac maen nhw'n cael eu derbyn gan y dolffiniaid. Yn ogystal, mae hanesion am ddolffiniaid yn helpu pobl mewn perygl ar y môr.

Ydyn, maen nhw'n greaduriaid rhyfeddol a dylen ni eu parchu. Yn anffodus, maen nhw'n anifeiliaid sydd o dan fygythiad hefyd. Mae newid yn yr hinsawdd, rhwydi pysgota a llygredd yn peryglu eu bodolaeth - heb sôn am greulondeb dyn tuag atyn nhw!

Creulondeb dyn

Mewn rhai rhannau o'r byd, mae dolffiniaid yn cael eu hela a'u lladd mewn modd creulon iawn. Yn ardal Taiki, Wakayama, Japan, er enghraifft, mae helfa flynyddol ac mae cannoedd yn cael eu lladd.

Beth sy'n digwydd? Mae dynion yr ardal yn gorfodi'r dolffiniaid i mewn i fae bychan ac yna'n gosod rhwydi yn y dŵr fel nad yw'n bosib iddyn nhw ddianc. Yna, mae'r dynion yn eu trywanu a'u lladd - dolffiniaid mawr, hardd a dolffiniaid bach, ifanc.

Mae'r bobl leol yn gwerthu cig rhai o'r dolffiniaid marw mewn marchnadoedd lleol - er bod rhai'n dweud nad yw'r cig yn ddiogel i'w fwyta.