Arwres!

Mae’r Gemau Olympaidd a’r Gemau Paralympaidd yn lle da i ddod o hyd i arwyr.

Mae rhai’n torri record y byd am gamp arbennig. Mae rhai’n fodelau rôl gwych ar gyfer pobl ifanc. Mae rhai’n gweithio’n galed iawn, iawn – maen nhw’n ymarfer yn galed ac yn byw bywyd llym er mwyn cyrraedd y brig. Mae rhai’n ceisio goresgyn problemau anodd ac anabledd er mwyn ennill medal. Mae rhai’n arwyr hyd yn oed os nad ydyn nhw’n ennill. 

Yusra Mardini 

Dyma Yusra Mardini, nofiwr o Syria yn wreiddiol. Roedd hi wedi cystadlu dros y wlad honno ym Mhencampwriaethau Nofio Byd FINA yn 2012.

Yn 2016, fodd bynnag, roedd hi’n cystadlu yn nhîm y ffoaduriaid, tîm o bobl oedd wedi gorfod ffoi o’u gwledydd eu hunain oherwydd rhyfel. Enillodd hi ddim medal yn y Gemau Olympaidd. Chyrhaeddodd hi mo’r rownd gynderfynol yn ei champ hyd yn oed, ond eto roedd hi’n arwres – ac mae hi’n parhau’n arwres heddiw!

Dianc

Mae Yusra yn dod o Ddamascus yn wreiddiol, dinas yn Syria sydd wedi gweld llawer o ryfela erchyll yn ddiweddar. Er mwyn dianc yn 2015, teithiodd hi a’i chwaer, Sarah, o Ddamascus, i Beirut ac yna ymlaen i Istanbul, Twrci ac i Izmir, lle roedden nhw’n gobeithio croesi Môr y Canoldir i deithio i Lesbos, Groeg, ac i fywyd heddychlon, gwell. 

Pan gyrhaeddon nhw Izmir, gwelon nhw’r cwch oedd i fod i’w tywys nhw i ryddid. Cwch bach ar gyfer chwe pherson oedd e, ond mynnodd y bobl oedd yn trefnu’r daith eu bod nhw’n gwasgu 20 o bobl i mewn iddo. Roedd y cwch yn beryglus o lawn!

I wneud pethau’n waeth, hanner awr ar ôl gadael y lan, torrodd yr injan. Roedd ofn ar bawb gan nad oedd y rhan fwyaf ohonyn nhw’n gallu nofio ac roedden nhw’n gwybod bod perygl y byddai’r cwch yn troi drosodd ac y bydden nhw’n boddi.

Neidiodd Yusra, Sarah a dynes arall - yr unig rai oedd yn gallu nofio – i’r môr ac, yna, am dair awr hir, buon nhw’n gwthio ac yn tynnu’r cwch bach nes iddo gyrraedd Lesbos yn ddiogel.

Ysbrydoliaeth

Mae’n amlwg bod Yusra’n berson ymarferol a dewr iawn. Gwelodd berygl ac ymatebodd ar unwaith.

“Pan fydd gennych chi broblem, does dim pwynt eistedd i lawr a chrio fel babi,” dywedodd.

Mae Yusra yn gobeithio cystadlu eto yng Ngemau Olympaidd 2020 yn Japan. “Dw i eisiau dangos i bobl eich bod chi’n gallu cyflawni rhywbeth dim ots pa mor anodd yw’r daith,” meddai. “Ar ôl pob storm, daw dyddiau gwell.”