Glas
Pan oedd Sadyrnau'n las,
a môr yn Abertawe'n rhowlio chwerthin
ar y traeth,
roedd cychod a chestyll a chloc o flodau
yn llanw'r diwrnod;
a gyda lwc,
ymdeithiem yn y pensil coch o drên
a farciai hanner cylch ei drac
rownd rhimyn glas y bae
i bwynt y Mwmbwls.
Eisteddem ar y tywod twym
yn yfed y glesni,
ein llygaid newynog yn syllu'n awchus
ar fwrdd y môr.
Dilynem ddartiau gwyn y gwylain aflonydd
yn trywanu targed y creigiau,
a sbiem yn syn
ar y llongau banana melyn o'r Gorllewin a
sglefriai'n araf dros y gwydr glas,
a gorffwys dan y craeniau tal
a grafai'r wybren glir
uwchben Glandŵr.
Rhain oedd Sadyrnau'r syndod,
y dyddiau glas.
Bryan Martin DaviesDarluniau ar Gynfas a Cherddi Eraill, Gwasg Gomer.
Geirfa
| Cymraeg | Disgrifiad | Saesneg |
|---|---|---|
| ymdeithiem > ymdeithio | mynd, teithio | to travel together |
| yn awchus | bod ag awydd/eisiau rhywbeth | eagerly |
Tasgau
TASG 1
Gwnewch restr o'r lliwiau sy’n cael eu henwi yn y gerdd. Yna, nodwch y canlynol. i) At ba synnwyr maen nhw’n apelio? ii) Pa fath o lun maen nhw’n ei greu?
TASG 2
Mae sawl trosiad yn y gerdd - i) 'pensil coch o drên' ii) 'ddartiau gwyn' iv) 'targed y creigiau' iii) 'gwydr glas'. Fesul un, nodwch ydyn nhw'n effeithiol? Os felly, pam?
TASG 3
Eglurwch ystyr y personoliad ‘a môr yn Abertawe’n rhowlio chwerthin ar y traeth’. Ydy'r personoliad yma'n effeithiol yn eich barn chi? Pam?
TASG 4
Gellir creu enwau o ansoddeiriau e.e. glas > glesni. Agorwch y daflen a llenwch y tabl ar ansoddeiriau.
TASG 5
Dychmygwch mai chi ydy’r bardd yn ysgrifennu yn eich dyddiadur ar ôl dychwelyd adref. Cofiwch sôn am y canlynol. i) Beth wnaethoch chi? ii) Beth welsoch chi? ii) Sut roeddech chi’n teimlo?
TASG 6
Gwnewch lun lliw o’r olygfa sydd yn y gerdd. Yna, gwnewch luniau unigol o’r trosiadau a’r personoliadau sydd yn y gerdd a’u gosod yn y mannau cywir ar y prif lun.
