Mae'r llywodraeth yn ystyried codi terfyn cyflymder ar y draffordd o 70 milltir yr awr (m.y.a.) i 80 m.y.a erbyn 2013. Ond mae ymgyrch i wrthwynebu'r syniad.
Y ddadl o blaid
- Yn 1965 cafodd 70 m.y.a. ei osod fel y terfyn cyflymder. Ers hynny, mae ceir yn llawer mwy diogel.
- Mae gostyngiad o 75% wedi bod yn nifer y rhai sy'n cael eu lladd ar y ffyrdd ym Mhrydain ers y 1960au.
- Mae tua 49% o yrwyr yn gyrru dros 70 m.y.a. fel mae hi ar hyn o bryd.
- Bydd yr economi'n gwella os bydd ceir a lorïau'n gallu teithio'n gynt.
- Mae traffyrdd wedi gwella, felly mae'n bosib gyrru'n gynt heb yrru'n beryglus.
- Os yw'r tywydd yn wael (e.e. glaw trwm neu niwl) bydd hi'n bosib tynnu'r terfyn cyflymder yn ôl i lawr.
- Os bydd unrhyw un yn gyrru dros 80 m.y.a., byddan nhw'n cael eu cosbi'n llym.
- Does dim terfyn cyflymder ar draffyrdd mewn rhai gwledydd, e.e. yr Almaen.
Y ddadl yn erbyn
- Efallai bod ceir wedi gwella, a bod traffyrdd wedi gwella. Ond a ydy sgiliau gyrwyr wedi gwella? Bydd mwy o ddamweiniau, mwy o waith i ysbytai a mwy o bobl yn marw.
- Bydd ceir yn llosgi mwy o danwydd. Felly mae dadl amgylcheddol yn erbyn codi'r terfyn cyflymder. Felly, bydd cyrraedd cyfarfod bum munud yn gynt yn costio'n ddrud mewn tanwydd.
- Bydd pobl anghyfrifol yn teithio ar 90 m.y.a.
- Mae traffig yn fwy dwys ar draffyrdd y DU, o'i gymharu â thraffyrdd Ffrainc neu'r Almaen.
Cafodd y terfyn cyflymder 70 m.y.a hwn ei gyflwyno ym mis Rhagfyr 1965. Cyn hyn, doedd dim terfyn cyflymder ar ffyrdd ym Mhrydain. Ar y pryd, doedd car teulu cyffredin ddim yn gallu mynd yn gynt na 70 m.y.a. beth bynnag. Cyn i'r terfyn cyflymder gael ei gyflwyno, roedd llawer o ddamweiniau wedi digwydd mewn niwl trwchus ar draffordd newydd yr M1.
Erbyn heddiw, mae car teulu cyffredin yn gallu teithio hyd at 120 m.y.a.
Lluniau: Lee Haywood, Brian Snelson a Leo Reynolds.
Geirfa
| Cymraeg | Disgrifiad | Saesneg |
|---|---|---|
| ymgyrch | 'brwydr' pobl sydd yn erbyn rhywbeth | campaign |
| gwrthwynebu | bod yn erbyn rhywbeth | oppose |
| terfyn cyflymder | chewch chi ddim mynd yn gynt na hyn | speed limit |
| gostyngiad | llai o nifer | reduction |
| yn llym | yn hallt, yn ddifrifol | severely |
| tanwydd | mae'n cael ei losgi i redeg injan | fuel |
| dadl amgylcheddol | dadl sy'n gysylltiedig â'r amgylchedd | environmental argument |
| dwys | trwm | intense |
| dros dro | am ychydig yn unig | temporary |
Tasgau
TASG 1
Cwblhewch y dasg sydd ar y daflen.
TASG 2
Trafodwch y ddadl sy'n cael ei chyflwyno ar y daflen.
TASG 3
Beth arall allwn ni ei wneud i gael cerbydau i symud yn gynt o gwmpas y wlad? Meddyliwch am syniadau newydd, arloesol.
TASG 4
Cwblhewch y grid sydd ar y daflen.
