Un o'r gang

Dw i isio tatŵ,

bod yn tyff 'fath â nhw,

rhannu smôc yn y sedd gefn

cyn i'r bws ysgol chwyrnu o'r iard,

llyncu mwg heb ddangos fod fy llygaid i'n dyfrio.

 

Dw i isio bod yn un o'r gang,

bod yn un o'r rhai cŵl

sy'n ofni neb, sy'n ateb nôl.

 

Dw i isio clustdlws crwn yn fy motwm bol.

 

Dw i isio

peidio

bod yma

fy hun

ar gyrion eu sibrydion:

-Pwy ydi hon?

- Gwdi-gwdi! meddai'r iwnifform newydd-

dim rhwyg, dim crych, dim olion mwd

a chwlwm fy nhei yn fy nhafod.

 

Dw i isio trochi 'nglanweithdra

yn nefi blŵ eu blerwch,

sgriffio'n sgidia' wrth ddringo i'r ochr arall -

lle mae'r chwerthin:

 

Dw i isio bod yn perthyn.

 

Sonia Edwards.

 

Allan o: Un o'r Gang gan Sonia Edwards, Bwrlwm. ACAC 2002.