Dim diolch!

Alergedd bwyd - y ffeithiau

Dyma rai ffeithiau pwysig am alergedd bwyd:

• Mae'n rhaid i bobl sy'n cael adweithiau difrifol gael help arbenigol ar frys gan barafeddyg hyfforddedig, fel arfer gyda phigiad o adrenalin.
• Yn y Deyrnas Unedig, mae tua deg o bobl yn marw bob blwyddyn o ganlyniad i anaffylacsis a achosir gan fwyd.
• I'r rhai sy'n wynebu'r perygl mwyaf, gall y mymryn lleiaf o alergen bwyd achosi symptomau difrifol, ac mewn rhai achosion, arwain at farwolaeth.
• Dydy llawer o'r bobl sy'n marw neu'n cael adweithiau 'difrifol iawn' ddim yn gwybod eu bod mewn perygl.

Pa fwydydd sy'n achosi alergedd?

• Yn Ewrop, caiff alergenau bwyd eu monitro a'u hasesu gan arbenigwyr clinigol a gwyddonol drwy Awdurdod Diogelwch Bwyd Ewrop (EFSA). Maent yn cynghori pa gynhwysion sydd  angen eu nodi ar labeli bwydydd sydd wedi'u pecynnu ymlaen llaw.
• Dyma rai o'r cynhwysion y mae'n rhaid eu nodi ar labeli os cânt eu defnyddio  mewn bwydydd wedi'u pecynnu:

   pysgnau

   cnau coed

   wyau

   sesame

   llaeth/llefrith

   pysgod

   soia

   grawnfwydydd sy'n cynnwys glwten

(h.y. gwenith, rhyg, barlys, ceirch, gwenith yr Almaen a kamut)

   mwstard

   seleri

Profiad Justin

Mae Justin, sy'n 13 oed yn dioddef o alergedd i gnau mwnci. Ysgrifennodd y blog hwn ar y we yn sôn am ei brofiadau ar wyliau ym Majorca.

Rydw i'n ysgrifennu hwn ar y we er mwyn codi calon pobl ifanc eraill fel fi sy'n dioddef o alergedd cnau. Wedi dweud hynny, rydw i'n cyfaddef fy mod yn lwcus mewn ffordd oherwydd dyna'r unig fath o gneuen sy'n peri problem i fi.

Fis yn ôl aethon ni fel teulu i aros yn y gwesty Delfin Azul yn Alcudia, Majorca  am bythefnos. Roeddem yn cael brecwast a swper yno i arbed y drafferth o fynd i rywle gwahanol bob nos a gorfod gofyn sut roedd bwyd yn cael i gwcio ag ati.
Wythnos cyn i ni fflio roedd fy mam wedi gofyn i'r cwmni awyrennau beidio â syrfio cnau ar yr awyren ond doedd dim posibl gofyn i'r teithwyr fwyta cnau roedden nhw wedi dod gyda nhw. Yn ystod y daith adref fe wnaethant gyhoeddiad dros y tanoi yn gofyn i'r teithwyr beidio â bwyta cnau o gwbl. Mae hyn yn eithaf anghyffredin. Doeddwn i ddim yn teimlo'n annifyr chwaith oherwydd doedd neb yn gwybod mai fi oedd yn dioddef o'r alergedd.A doeddwn i ddim yn edrych yn wahanol i lawer o deithwyr eraill pan oeddwn i'n bwyta brechdannau roedd mam wedi eu paratoi ymlaen llaw.

Roedd gennym ddwy set o  Epipens a thabledi Piriton yn hytrach na ffisyg (oherwydd y rheol 100ml o hylif ). Roedd y ddwy set mewn bagiau plastig 8x8" gyda phresgripsiwn a nodiadau'r doctor. Roedden nhw mewn hand luggage ar wahân rhag ofn i un bag fagu traed!Yr hyn sy'n cael ei gadw ar fy nghyfer yn ystafell feddygol yr ysgol oedd yr ail set ac rydw i wedi mynd ag ef yn ôl yno erbyn hyn.

Pan wnaethon ni gyrraedd yr hotel gofynnodd fy mam pa fath o olew roedden nhw'n ei ddefnyddio i goginio ac fe ddaru nhw ddweud mai dim ond olive oil neu olew llysiau oedd yn cael ei iwsio yn y gegin ac mai'r unig bryd gyda chnau ynddo oedd Cyw Iâr Almwnd. Holodd mam ddim am y pwdinau oherwydd does gen i ddim dant melys o gwbl!

Fe wnes i fwyta'r bara oedd  yn y gwesty oherwydd doedd dim perygl o gnau ynddo ac i frecwast roeddwn i wrth fy modd gyda'r holl fwyd oedd wedi ffrio. Doeddwn i ddim yn bwyta'r cereals.

Cawsom un pryd o fwyd mewn Burger King ble'r oedd rhestr fanwl o 'gallai gynnwys' ar gefn y tray. Roedd hwn mewn Sbaeneg ond roedden ni'n gallu deall digon.

Roeddem yn prynu'r rhan fwyaf o'n snacks o'r siop Spar gerllaw'r gwesty gan bod llawer o fwydydd Prydeinig yno a'r cynhwysion wedi eu labelu yn Saesneg. Bwydydd wedi eu pacedu'n barod oeddem ni'n eu bwyta rhag ofn! Wedi'r cyfan, doeddwn i ddim am gael fy rhuthro'n anymwybodol i ysbyty ble'r oedd y nyrsus i gyd yn siarad Sbaeneg!

Felly, diolch i ofal fy rhieni cefais wyliau hollol ddi-drafferth o ran fy alergedd i gnau mwnci ac mae'r gwyliau wedi profi y gallaf, pan fyddaf yn hŷn, fynd ar wyliau gyda fy ffrindiau cyn belled â'm bod yn ofalus!