Gyrfaoedd ym maes gwleidyddiaeth

Annwyl Swyddi Cymru,

Mae gen i ddiddordeb byw iawn mewn gwleidyddiaeth ers pan oeddwn i’n ifanc iawn. Rwy’ wrth fy modd yn dilyn beth sy’n digwydd yn y Cynulliad yng Nghaerdydd ac yn Nhŷ’r Cyffredin yn Llundain.

Hoffwn i weithio ym myd gwleidyddiaeth, ond fyddwn i ddim eisiau bod yn wleidydd, chwaith.

Byddwn yn ddiolchgar iawn am unrhyw gyngor.

Diolch yn fawr.

Cofion,

Dylan Huw

Annwyl Dylan Huw,

Diolch yn fawr am dy neges. Mae gwleidyddiaeth yn faes diddorol dros ben a does dim rhaid bod yn wleidydd i weithio ynddo.

Wedi dweud hynny, mae ymddiddori mewn gwleidyddiaeth yn gam cyntaf pwysig iawn.

Os wyt ti’n cefnogi un blaid wleidyddol yn benodol, wyt ti wedi ystyried gwirfoddoli gyda’r blaid honno? Neu gallet ti wirfoddoli gyda mudiad, e.e. mudiad iaith, amgylcheddol, er mwyn dysgu rhagor am sut mae’r system wleidyddol yn gweithio. Mae profiad gwaith gwirfoddol yn aml yn llwybr i mewn i’r maes.

Mae rhai pobl yn astudio gwleidyddiaeth yn y brifysgol cyn cael swydd yn y maes hwn, ond does dim rhaid o gwbl. Er enghraifft, gallet ti astudio unrhyw bwnc, ond dy fod yn gwneud gwaith gwirfoddol (fel y soniais i uchod) gyda mudiad, plaid neu undeb y myfyrwyr. Byddai hynny’n dangos dy fod yn ymddiddori mewn gwleidyddiaeth.

Dyma rai swyddi penodol, felly:

Ymchwilydd sy’n gweithio gyda phlaid wleidyddol neu gydag Aelod Seneddol

Mae ymchwilwyr yn:

• darllen beth sy’n cael ei ddweud yn y wasg / y cyfryngau cymdeithasol ac ati
• ymchwilio i gefndir materion gwleidyddol
• ysgrifennu adroddiadau
• helpu gyda busnes yn yr etholaethau

Asiant plaid wleidyddol

Mae asiantau plaid wleidyddol yn:

• trefnu a chynorthwyo plaid wleidyddol mewn etholaeth a hyrwyddo’r blaid a’r cynrychiolwyr
• gweithio oriau hir amser etholiadau, yn gwneud llawer o ymgyrchu a chanfasio

Newyddiadurwr gwleidyddol

Mae newyddiadurwyr gwleidyddol yn:

• casglu a dadansoddi gwybodaeth am yr hyn sy’n digwydd yn y Cynulliad yng Nghaerdydd neu yn San Steffan yn Llundain
• paratoi adroddiadau, erthyglau a chyfweliadau – ar gyfer papurau newydd, cyhoeddiadau ar-lein, darllediadau teledu a radio
• rhoi gwybod i’r cyhoedd am newyddion gwleidyddol sy’n digwydd yn lleol, yn genedlaethol, ym Mhrydain, yn Ewrop a thu hwnt.

Y gwasanaeth sifil

Mae gweision sifil yn:

• gwneud gwaith gweinyddol y llywodraeth – yng Nghaerdydd neu yn Llundain
• gweithredu polisïau’r llywodraeth, felly mae gweision sifil yn gallu gweithio mewn meysydd sy’n cael effaith fawr ar fywydau bob dydd pobl, e.e. iechyd ac addysg.

Wel, Dylan, gobeithio bod hyn o ryw gymorth i ti. Y prif beth, rwy’n meddwl, yw cael profiad gwaith gwirfoddol yn gyntaf.

Cofia gysylltu os gallaf fod o gymorth eto.

Hwyl am y tro,

Sara Williams