Eira, eira hwyr y dydd

Rhifyn 5 - Y Tywydd

Eira, eira hwyr y dydd

Eira, eira, hwyr y dydd.
Lloer o'i harffed ddiwedydd
yn hau ceinioge newydd,
Eira, eira hwyr y dydd.

Eira, eira hwyr y dydd
fel cen lond pen y pinwydd.
Trwch fel conffeti ar wydd.

Lleuad wen fel gobennydd,
plu'r cwd yn pylu'r coedydd
Eira, eira hwyr y dydd.

Eira, eira, hwyr y dydd,
Fel gefail y gaeafwydd,
Gwreichion gwyn ar derfyn.

Eira, eira hwyr y dydd
Siampaen, siampaen yw'r pinwydd,
Eira, eira hwyr y dydd.

Alan Llwyd

Geirfa

Cymraeg	Disgrifiad	Saesneg
arffed	côl, glin	lap
cen	darnau bach o groen marw yng ngwallt rhywun	dandruff
pinwydd	coed pîn	pine trees
gefail	teclyn haearn sy'n gafael yn dynn, gweithdy gof	tongs, forge
gwreichion	darnau bach tanllyd sy'n neidio o'r tân	sparks

Tasgau

TASG 1

Ysgrifennwch frawddeg yn rhoi cynnwys y gerdd yn eich geiriau eich hun.

TASG 2

Mae'r bardd yn personoli'r lloer yn y pennill cyntaf. Dywedwch sut mae'n gwneud hynny.

TASG 3

Pa mor effeithiol ydy'r ffordd mae'r bardd yn personoli'r lloer yn eich barn chi? Rhowch reswm.

TASG 4

Mae'r bardd yn defnyddio trosiadau a chymariaethau yn y gerdd hefyd. Lawrlwythwch y daflen a llenwch y tablau.

TASG 5

Pam, yn eich barn chi, mae'r bardd yn ailadrodd 'Eira, eira hwyr y dydd?'

TASG 6

Ar ôl ystyried elfennau arddull y gerdd, sut, yn eich barn chi, mae'r bardd yn teimlo tuag at yr eira? Rhowch resymau dros eich ateb.

TASG 7

Ysgrifennwch gerdd am y gaeaf. Defnyddiwch y technegau canlynol i ddangos eich bod naill ai'n hoffi neu'n casáu'r gaeaf - 2 bersonoliad, 3 throsiad, 2 gymhariaeth, 4 ansoddair e.e. 'llithrig', 'trwchus', 'tywyll', 'rhewllyd', 'peryglus', 'ffyrnig', 'noeth', 'pigog', 'slei', 'tawel', 'swnllyd'.

Eira, eira hwyr y dydd