Grub Kitchen! Ble? Beth? Pam?

Byrgers pryfed ... cookies criciaid ... burritos pryfed ... hufen iâ cyffug gyda mwydod bambŵ - dyna rai o’r pethau gallwch chi eu bwyta os ewch chi i dŷ bwyta newydd yn Nhyddewi. Grub Kitchen ydy enw’r lle ac mae’n cynnig prydau pryfed ochr yn ochr â phrydau mwy traddodiadol.

Mae’r prif gogydd, Andrew Holcroft, fel unrhyw gogydd gwerth ei halen, eisiau creu prydau bwyd diddorol a blasus yn y tŷ bwyta ond yn ogystal, mae e eisiau dangos bod bwyta pryfed yn gallu bod yn beth “normal” iawn. Wedi’r cyfan, mae dros ddwy filiwn (2 000 000 000) o bobl ar draws y byd yn bwyta pryfed heddiw.

Ar hyn o bryd, mae’r tŷ bwyta’n mewnforio’r pryfed o Ganada a’r Iseldiroedd ond mae partner Andrew Holcroft, Dr Sarah Beynon, wedi dechrau ffermio pryfed gerllaw er mwyn dangos y gallai pryfed gymryd lle cigoedd eraill fel porc, cig eidion, cig oen ac yn y blaen. Nid yw’n gyfreithiol ffermio pryfed i’w bwyta ym Mhrydain ar hyn  bryd.

Bwyd maethlon

Mae pryfed yn faethlon iawn.  Edrychwch ar y sboncyn y gwair yma, er enghraifft, sy’n cynnwys llawer o haearn a chalsiwm.

Cymharwch y maeth sydd yn y creadur bach yma â’r maeth sydd mewn byrger cig eidion arferol.

Faint mewn 100 gram:

Mae rhai pobl yn dweud bydd rhaid i ni fwyta mwy o bryfed yn y dyfodol gan fod poblogaeth y byd yn cynyddu mor gyflym. Felly, yn y dyfodol, efallai y byddwn ni’n bwyta sboncynnod y gwair mewn reis wedi ffrio neu mewn meringue. Pwy a ŵyr?

Barn y cyhoedd

Beth ydych chi’n ei feddwl o’r syniad o fwyta pryfed?

Ydych chi eisiau bwyta’r pryfed blasus sy’n cael eu cynnig yn y Grub Kitchen  neu ydy’ch stumog chi’n troi wrth feddwl am fwyta mwydod (pryfed genwair yn y gogledd), criciaid neu bryfed eraill? 

Postiwch eich syniadau isod.

Sylwadau

Irfan

Pam lai? Mae dwy filiwn (2 000 000 000) o bobl yn bwyta pryfed yn barod, felly pam lai?

Sofia

Bwyta pryfed? Dim diolch! Dw i wedi edrych ar luniau o’r pryfed yma ar y we ac maen nhw’n edrych yn ofnadwy.

Hanna

Dyna pam dydy pobl ddim eisiau eu bwyta nhw – achos maen nhw’n edrych yn ofnadwy. Petai pobl yn cau eu llygaid i’w bwyta, efallai y bydden nhw’n eu mwynhau nhw.

Sofia

Dw i ddim yn meddwl!

Rhys

Mae bwyta pryfed yn well i’r amgylchedd.

Sofia

Pam?

Rhys

Maen nhw’n bwyta llai a hefyd maen nhw’n cynhyrchu llai o nwyon, felly mae bwyta pryfed yn well i’r amgylchedd na bwyta cig arferol.